Diaspora në Debat dhe Narrativa Shqiptare është një grup i krijuar nga përfaqësues të diasporës shqiptare dhe profesionistë nga fusha të ndryshme, me synimin për të kontribuar në debatin publik dhe në mënyrën se si pasqyrohen zhvillimet politike dhe shoqërore në Shqipëri.
Grupi është krijuar në mbështetje të protestave të studentëve dhe në vazhdimësi të frymës së Flamingo Revolution, duke mbështetur të drejtën e tyre për t’u dëgjuar dhe për të shprehur kërkesat e tyre në mënyrë të lirë dhe qytetare.
Qëllimi ynë është gjithashtu të marrim pjesë aktivisht në narrativën publike dhe mediatike që krijohet rreth këtij mobilizimi. Duam të japim këndvështrimin tonë, të sqarojmë pozicionet dhe të shmangim që konfuzioni, spekulimet apo interpretimet e pakonfirmuara të zbehin apo deformojnë mesazhin e një lëvizjeje që ne e konsiderojmë legjitime.
Ne nuk synojmë të flasim në emër të studentëve, por të mbështesim të drejtën e tyre për t’u dëgjuar dhe të kontribuojmë që debati publik të mbështetet mbi argumente, transparencë dhe përgjegjësi.
Ndër pjesëmarrësit janë
- Arben Iliazi – artist piktor.
- Ariona Bundo – profesioniste në fushën e financës dhe menaxhimit të aseteve, e angazhuar gjithashtu në çështjet që lidhen me diasporën shqiptare.
- Ejsi Berisha – specialiste në financë, përputhshmëri rregullatore, luftën kundër pastrimit të parave dhe konsulencë.
- Albina Alika – ish-gazetare; në Francë ka punuar si këshilltare sociale pranë organizatave që mbështesin gratë, viktimat e dhunës dhe personat migrantë.
Diaspora në Debat dhe Narrativa Shqiptare synon të krijojë një hapësirë serioze, të hapur dhe konstruktive, ku diaspora të mund të marrë pjesë në debatin publik, të paraqesë këndvështrimin e saj dhe të kontribuojë në një komunikim më të qartë rreth zhvillimeve që prekin shoqërinë shqiptare.